卡塔爾世界盃日記 Day15
英法兩場太正路，下半場冇晒睇頭
是日去咗多哈最大公園Aspire Park逛逛，呢個市肺佔地88公頃，比四個維園仲要大，位處大商場Villaggio旁邊，可以望到卡拉發球場同埋火炬酒店（The Torch Doha）。公園綠草如茵，好多小朋友喺度踢下波仔，跑來跑去，有人席地而坐野餐，非常慢活，日落時風景更加優美，月亮喺黃昏前已經高掛天上。
公園中間有個湖，名字好易估，叫做Aspire Lake，佢係卡塔爾唯一湖泊，湖中有鴨仔游來游去，一條石橋橫跨兩岸，形成靚絕嘅風景構圖。遊人可以踩下水上單車，石橋不遠處有一個充氣玩意喺水上漂浮，兩個小朋友喺裡面反轉再反轉，玩得不亦樂乎。
湖嘅另一邊有一條步道俾弧形水柱包住，喺夕陽底下滲出金光。
園內有一個雕塑，一隻馬拉住架車，車上有兩個巨大翠玉瓜。呢個雕塑大有來頭，原本放喺紐約中央公園入口，叫Perceval，係著名英國藝術家Sarah Lucas嘅作品。
好多小朋友放學後嚟到公園遊樂場放電。
阿拉伯女士於Aspire Park漫步。
公園內特意放置世界盃裝飾供遊人打卡，背景係火炬塔樓。
園內最少有三間餐廳，仲有小食檔，不愁冇咖啡飲，但真唔明卡塔爾夏天可以高達45度以上，點解大部份食店都冇凍啡，得熱咖啡供應。45度飲熱啡同零度食雪糕，係同等挑戰。
日落後，喺園內一間別緻嘅木屋餐廳平台坐低睇頭場，視野對正卡拉發球場同火炬酒店，幾好mood。火炬酒店原為2006多哈亞運嘅火炬大樓，當時聖火就喺塔頂燃燒，亞運過後變成五星級酒店，係多哈嘅icon建築。
兩場波都冇爆冷，英法攜手晉級，但冷場就好多嘞，一早拉開比數，非常腌悶。當然英格蘭躉唔會覺悶嘅，不過下場對法蘭西先係大考驗。
呢處真係小朋友嘅天堂，除咗公園有好多嘢玩，公園旁邊仲有個為細路而設嘅KidZania，裡面有一個以世界盃為主題嘅歡樂天地，仲有一個佔地好大嘅角色扮演小社區，兩者都要畀入場費。
睇地圖已經知道呢個小朋友天地有幾大，裡面有戲院、大學、醫院、銀行、警局、酒店，有巴士行走，小朋友喺入面就要做好佢哋揀咗嘅角色，玩樂之餘學習盡責做好本份。
因為Villaggio已經去過兩次，晚餐去隔籬個Hyatt Plaza摸索下，揀咗連鎖店Nando's試下，無非俾佢個烤肉造形吸引。呢串嘢每枱必叫，上枱時肉汁係咁滴落嚟，確係冇得輸，重點係要配埋兩種自家醬汁。配菜嘅菠菜同蒜蓉包都出奇好食，呢餐食得好滿足。
是日16強賽果：
法國 3:1 波蘭
英格蘭 3:0 塞內加爾
影片：
2022.12.04
Comentários