卡塔爾世界盃日記 Day14
荷蘭率先闖八強
今日係我同港婦睇最後一場荷蘭比賽，八強打後我哋已返泰國，會喺泰國繼續支持荷蘭橙，直到佢捧起獎盃。最後一次機會，當然又要參加荷蘭巴士進場巡遊，活動之前先去Villaggio食個晏。
話說上次嚟到Villaggio已經見到呢間Attila Mongolian Grill快餐店，覺得相當過癮，所以今日一於試下。玩法係先到Cashier畀錢，然後攞住個托盤向前行。
首先用細碗盛載肉類，如果畀咗最貴嘅海鮮餐價格，即係可以夾任何肉類，包括牛、雞、海鮮，配搭自由，份量亦適隨尊便，不過有個牌叫客人唔好裝到滿瀉。
第二隻碗裝蔬菜，有好多種類任揀。第三隻碗比較大，用嚟裝麵。第四隻碗裝醬汁，鍾意點溝就點溝。於是盤上有四碗嘢。
之後排隊等鐵板師傅主理，師傅會將七、八個客人嘅食材分開放喺大鐵板上，先煎熟肉類，再將菜、麵同醬汁分批加入炒埋一齊。
最後炒出一碟香噴噴嘅雜錦炒麵，每一碟都係顧客自選嘅個人口味。
食飽即刻去搵荷蘭巴士，呢架巴士嘅來頭之前已經介紹過，千里迢迢而來，老而彌堅，車頭寫上由荷蘭遠征多哈嘅距離：4885公里！聚會現場嘅氣氛真係不得之了，大家載歌載舞，橙色兵團未開波先贏陣。
有小朋友大展倒掛腳法，可能佢就係橙衣兵團嘅未來主力。
巴士開行，球迷列隊向球場進發，沿途繼續玩成一片。
大戰一觸即發，2022世界盃首場淘汰賽開打，兩隊只能活一隊！
當荷蘭打開紀錄，最壯觀嘅場面終於出現：人浪！全場球迷輪流企起身歡呼，呢種澎湃嘅場面真係一世人一定要體驗一次。
比賽過程相當順利，雖然一度被美國唔係射波嘅射波追番一球，一度掀起緊張，但橙軍好快入到燕疏球，亮麗咁贏出一仗，荷蘭隊現時狀態絕對比分組賽時fit。好嘅教練，例如雲高爾，一定會好好令球隊逐步登上高峯。我信方仗。
贏咗波咁happy，當然要去酒吧下場啦，睇阿根廷場波，雖然係贏得合理，但最後一刻差啲被澳洲逼和，說服力唔多夠。下場荷蘭對阿根廷，我好相信美斯要執包袱。酒吧有好多荷蘭fans，齊齊炒熱個場，我哋當然要盡情慶祝，所以寫到呢度，今晚仲有排飲。Party just begins！
是日16強賽果：
荷蘭 3:1 美國
阿根廷 2:1 澳洲
影片：
2022.12.03
Comments