卡塔爾世界盃日記 Day6
伊朗絕殺威爾斯反底 撐伊朗球員支持國內示威！
荷蘭打得好差，唔該下場醒神啲
又到荷蘭作賽之日，好彩昨晚收到FIFA嘅email，知道荷蘭賽前巡遊嘅集合地點，主角一定係嗰架千里迢迢一路駛來嘅荷蘭老爺巴士，點都要去會下佢！賽事7點開波，球場4點開放，荷蘭橙造勢大會2點開始，地點喺球場左近。所以夜晚開波，我哋中午就出動。
荷蘭對厄瓜多爾呢場A組賽事喺卡拉法球場（Khalifa International Stadium）開打。
一去到開P地點，即刻衝去同架巴士打卡，呢架巴士老而彌堅，每逢大賽都會幾經艱辛開到去主辦國現場，南非嗰屆都唔例外。
現場就似嘉年華，DJ喺巴士上層打碟，球迷載歌載舞揮旗打氣，聲勢一時無兩。
橙迷當然唔少得互相合影，留個美好回憶。Oranje！
到4點鐘，夕陽西下，巡遊正式開始，巴士徐徐向場館進發！橙迷列陣跟喺巴士後面，齊齊唱住幾首節奏明快嘅主題曲，每行一小段路就會停低，隨著音樂手舞足蹈，完全係忘我境界。
一聽到呢首歌，大家就知道有嘢玩。唱到lu lu lu lu⋯⋯，全世界一齊跳向左又一齊跳向右，絕對係最佳進場方式。
可惜今日荷蘭表現乏善足陳，一開波入咗一球以為可以大勝，點知越打越唔對路，唔輸算偷笑。冇得提早慶祝出線，唔該班球員下場醒目啲，唔好要橙迷食驚風散！法蘭基迪莊，聽到未呀？
是日賽果：
威爾斯 0:2 伊朗
卡塔爾 1:3 塞內加爾
荷蘭 1:1 厄瓜多爾
英格蘭 0:0 美國
影片：
2022.11.25
Comments