卡塔爾世界盃日記 Day16
日本咁辛苦守到尾，點解12碼射成咁？
手掌又係肉，手背又係肉。今屆日本踢得咁熱血，冇理由唔撐佢哋，但今仗對手係我喜愛嘅克羅地亞，上屆格仔兵團就一路殺到入決賽，實力非凡。最終都係買咗兩支旗仔——日本同南韓，做東亞雙雄嘅小粉絲。
下午先去雨傘公園（Umbrella Park）影下相，呢度位處多哈心臟地帶，一出Corniche地鐵站就見到，幾條走廊圓拱頂部掛滿雨傘同植物，色彩繽紛如萬花筒。
Umbrella Park位於Al Masrah公園之內。而喺Al Masrah公園一角有一個巨大海牛雕像，高21米，闊31米。呢個名為「Dugong（儒艮，即海牛）」嘅雕像出自知名美國藝術家Jeff Koons之手。卡塔爾政府大灑金錢，想將多哈街頭變成戶外博物館。
喺Corniche大街上可以見到另一個雕塑地標，就係珍珠紀念碑（Pearl Monument）。呢個噴泉地標係為咗紀念多哈最早依靠嘅採珠業而建。
下一站去到Msheireb商業區，步行街嘅路上鋪咗電車路軌，兩旁除咗商廈地舖有靚餐廳，仲有好多露天雪糕檔、小茶座，亦有好多公共座位供遊人閒坐，每隔約10分鐘就有一列電車緩緩駛過，別具特色。我哋就霸咗張長凳好舒服咁睇日本場波。睇到互射12碼，有成五、六個人圍觀我部電腦，大家都想日本贏。
可惜去到呢一刻，日本三位球員都射咗個毫無質素嘅地波，一一被格仔軍門將輕易撲出，神奇之旅要終止了。雖然佢哋努力值得肯定，但不禁想問：有冇練過12碼㗎？
呢三個唔使問係阿根廷迷啦。
到泡菜仔登場，實力始終同巴西有好大分野，輸波實屬正常。我嘅世界盃日記亦即將完結，聽日開波之時，我已經喺機場check緊in，餘下賽事會喺曼谷睇，希望橙衣兵團歷史性捧起世界盃啦！
是日16強賽果：
日本 1:1（互射12碼1:3）克羅地亞
巴西 4:1 南韓
影片：
2022.12.05
Comments