2013年4月13日是傣曆新年宋干節的開始，泰國人一連數天狂歡慶祝。呢個節日有個更親切貼地嘅名稱：潑水節。大家周街潑，起勢潑，水花四濺，大人細路濕晒身。港佬同港婦首次在清邁過宋干節，決定揸架車去古城湊下熱鬧。其實之前都掙扎咗好耐，又想唔濕身，又想睇熱鬧，雖然住所附近的大商場都有大型活動，但都是以演唱會為主，當然大家都會互相潑水，但講到戰況激烈，當非古城莫屬。針冇兩頭利，死就死啦！
帶唔帶水槍？著唔著戰衣？最後決定：裸赴，零裝備！諗過度過，冇武器就係最勁嘅武器，正所謂：一副戰鬥格，實俾人追殺。計劃是揸車去到古城內一間餐館醫咗肚先，但未去到古城，條路已經塞死晒，原來由於護城河嘅水有如滔滔江水連綿不絕，大家好順手就可以攞嚟淋，取之不竭，所以主戰場就在古城外圍。還有很長路才去到赤壁，站在斗車上的泰國人急不及待揭開戰幔。
我哋喺車內隔窗觀戰，路邊小朋友拿著水喉玩大蛇屙尿，拖鞋哥手舞足蹈貓王上身，認真興奮。斗車在清邁很普遍，今日更堪稱總動員，無數運兵車穿梭古城，貨斗上隨時載著七、八個狙擊手，也有辣妺坐在車尾等人射。
車上肥仔豁出去：淋我啦！
噼噗！擋風玻璃硬食一招。人未落場，看得心癢癢，冇計，想求其搵個位泊都冇。
每架車上都放了一大桶水，但總有彈盡糧絕嘅時候。唔使青，有人做加德士，不停為你「加油」，電單車則喺水橋下捐過，場面搞笑。
趁未落車，講個古。潑水節咩起源，眾說紛紜，多謝馮睎乾fb介紹返，有這樣一個故事，原來咁有禪味，而且牽涉到人的光彩，在此轉述分享。話說從前有個聰明絕頂嘅人叫達摩班（Dhammaban），佢叻到識聽雀仔語言。有日天神降臨考考佢：一個人早午晚的光彩分別喺邊度？天神開牌頭，七日內答不到要人頭落地，答對了則天神自己斬首，呢鋪唔係人頭博芋頭，係人頭博神首。達摩班絞盡腦汁都係諗唔掂，心想弊傢伙，咁啱就聽到兩隻「金翅仆佳鳥」喺度傾偈，一隻話：答案好簡單，朝早人的光彩喺面度，因為朝朝都要洗面；下午光彩在身上，因為人會沖涼；夜晚光彩喺雙腳，因為瞓前要洗腳，人能行此三事必有榮光，令人尊敬。
達摩班照辦煮碗答天神，天神愕然之餘唯有砍頭找數。但天神個頭又豈可亂丟，著陸大地會著火，入海汪洋會乾涸。為免世界末日，天神七個女兒將父親個頭送入神山洞穴，每逢新年其中一女就會托住個頭巡遊為世人祈福，遊行之日就成為潑水節。所以，今日的潑水習俗正正呼應了故事中的「光彩」謎題（馮翁原文：https://m.facebook.com/story.php?story_fbid=pfbid0JQg2G48sXAnKEzBgKo5KPv3W2jSkES3FZAjQ163NTHUTPiTV3dmHrwvaE9mgQSbNl&id=100067319133361&sfnsn=mo&mibextid=afzh1R）。
將潑水節提升到哲學層次，大家狂歡之餘都可以省思一下，我嘅啟發係：嗰啲身無榮光、俾人潑下都要治罪嘅人，認真要徹底清洗一下，洗面、洗身定洗腳？梗係洗心革面啦。
差不多花了一小時，終於入到古城，泊低架車，嚟料啦！呢位辣媽先來個下馬威，都話路邊的辣媽不要睬。
呢位靚女射得好溫馨。一睇街上人，頓時發覺失策了，雖則不帶裝備，但有樣嘢人人有得我哋冇，就係游水用的防水膠套，用來裝手機銀包。我銀包放在褲袋，最後濕透了⋯⋯
鬼佬勇戰成群泰妹。
這裡是我們下車後第一個戰場，兩邊陣營隔著馬路對戰，你來我往不知幾多個回合，最後兩個鬼佬雞咁腳敗走。
路過車輛加入戰團，三角大混戰。
側擊偷襲！
坐篤篤車闖關，乘客被人照頭淋；斗車少女水槍還擊，不亦樂乎。
透Bra誘惑，好香艷。
仲唔變落湯雞？！
古城邊的護城河成為最強「子彈庫」，河水十分污糟，垃圾浮下浮下，但當地人一於少理，撥一撥就用桶撈，源源不絕咁供應畀玩水嘅人。
我們從古城中央走到古城東面，再沿護城河往塔佩門進發，沿途有美少女「輕裝」上陣，大派福利。
龍頭還未關，昂然流下去，清洗我小宇宙⋯⋯
終於來到塔佩門，為咗部片，港婦對住鏡頭講完一輪，冷不防被老外施襲。實則係我話拍唔到佢遇襲場面，叫佢上前申請做目標。做KOL梗係要犧牲下。
小妹妹連白鴿都唔放過，哈哈哈！
Happy Songkran Festival！
塔佩門一向都是清邁最熱鬧的地方，每逢節慶例必堆滿遊人。今日才是宋干節慶的第一日，連同星期日，仲有三日狂歡！
喺古城玩咗半日，最先諗住盡可能濕少啲，感受下氣氛就算，但世事邊有咁理想，處處水花、水柱甚至水瀑，避無可避，最後我哋由頭濕到落腳，卻過癮十足。記住潑水係一種祝福，潑的人要懷著祝福的心，被潑的也要懷著感恩的心，喺清邁呢個水秀山明嘅地方，在這個水花四濺的日子，身處水銀瀉地的古城，祝願大家水到渠成、水滴石穿！
影片：
2023.04.17
Comments