來到清邁先要處理好「開門七件事」，銀行開戶、兌泰幣、通訊、上網、交通⋯⋯就讓我逐一介紹。
①SIM卡
現今世代，冇得上網慘過行刑，最先必定要搞掂張SIM卡。泰國三大電信商為AIS、true和dtac，港佬見AIS的宣傳最行，所以揀咗佢。手續很簡單，不用講解，但一定要帶passport實名登記。幾錢呢？平到你唔信，4G Plan一年盛惠1200泰銖，折合港銀250元，即月費$20.8！！5G當然貴一點，每月399泰銖（83港元）。港佬有個庹縮老婆，加上很少用手機睇片，所以選了4G，用落完全流暢無問題。技術性數據：首70GB網速300Mbps, 其後限速128Mbps，網內通話免費，網外通話包60分鐘。另外，在泰國通話，打出嗰個畀錢，接聽唔使畀。電話號碼長10個數字，恰人記性差。
至於香港個冧把，當然要養住，離港之前要處理好，方便朋友WhatsApp之餘，更重要是接收銀行等傳來的一次性密碼。我選了Smartone，養卡Plan首年$118，其後每半年增值$50。另外，泰國人很少用WhatsApp，主要用LINE溝通。
又另外，如果要致電回港而且要打去固網電話，例如要打去銀行問嘢或做投資，可用Skype，幾毫子一分鐘，唔使用漫遊通話咁蓉，遇著啲熱線要你聽十幾分鐘音樂都冇咁火滾。
②銀行開戶
開戶必須帶passport及相關證明，Elite、退休簽證、讀書簽證同買樓人士可開戶，旅客不可。最多人用的是K-Bank（開泰銀行）和Bangkok Bank（盤谷銀行）。開戶要預多點時間，由輪候到填一大堆表格，隨時花兩粒鐘。完成手續後，會有一本存摺簿同一張Debit Card。最重要是安裝銀行App，裝咗之後就可以在購物時掃QR Code付款，也可以轉賬給他人，非常方便。基本上這裡的人大都不用現金了。留意7-11只接受TrueMoney，沒有的話可用Debit Card支付。
③香港Debit Card
這一件事其實要在離港前辦妥，極為有用。香港有兩間銀行推出Debit Card，可存12種貨幣：港元、美元、英鎊、日元、人民幣、歐元、泰銖、澳元、新西蘭元、新加坡元、加拿大元及瑞士法郎，好處是可選擇個rate靚仔嘅時候唱定先，留作日後消費。而且不只在泰國有用，旅行都啱使。它基本上就是一張沒有信用額的Master Card，7-11買支水又用得，食飯簽賬又碌得。
④兌泰幣
全世界都係用Wise，個rate最靚。靚過匯豐等香港銀行、靚過泰國各銀行、靚過各大找換店。過程係有少少轉折，先輸入入賬賬戶（如自己的泰國戶口）同銀碼，再按指示將相應港幣存入Wise的香港戶口（即是一般要用到兩個App），回到Wise確認已過數，幾小時至一兩日後（視乎是否撞正假期）就收到錢。
⑤Call車App
未有車牌，四處出動當然要靠Call車。清邁流行三個Call車App，下一篇介紹。
以下兩件事並非最急切，但安頓好後都要處理：
⑥家居上網＋電視盒子
租到屋長住之後，就要搭通Wi-Fi天地線。我都係幫襯咗AIS，基本Plan每月249銖，有師父上門安裝router，加50銖有個電視盒，不過節目以泰文為主。想看香港節目和中文字幕電影劇集，以至確保有歐聯大波睇，就要在香港買定機頂盒，很多人用安博，我則用了Monster。
⑦考車牌
在清邁，沒有車就是跛了腳，所以站穩陣腳之後一定要考車。由於港佬港婦剛落腳又要飛卡塔爾睇世界盃，再在曼谷漂流一個月，考牌同轉牌留待回清邁處理，日後分享。
這些是在泰國常用的App。Wise用來兌泰幣；LINE與泰國人通訊；Grab、Bolt和inDrive是Call車App；K PLUS（K-Bank）和BualuangM（盤谷銀行）主要用作掃碼付款；翻譯App當然在雞同鴨講時可大派用場；AIS唔知點解有兩個App，都是用來管理電話卡賬戶。
2022.11.06
泰國sim卡、泰國銀行開戶、泰國call車app、泰國家居上網
Comentários