清邁公共交通不算發達，雖然叫做有巴士，但很少很少見到巴士在路中行駛，更從來冇見過有人在巴士站等車，所以基本上當它不存在就可以了。這裡常見的公共交通工具有兩種：篤篤和雙條車。篤篤（Tuk Tuk）大家都很熟識了，其實就是的士，車頂上會有「TAXI」燈箱。篤篤為遊客而設，收費不太化算，地道人很少乘搭。
雖然已經「開關」，但疫情仍然嚴重影響清邁旅遊業，古城等旅遊點附近周街都有篤篤等客，但行人異常稀疏，司機都百無聊賴等運到。
另一種常見交通工具是雙條車（Songthaew），有人叫雙排車，但「雙條」讀音貼近泰文比較傳神。鬧市行走的都是紅色雙條，其實有很多顏色的雙條行駛中遠程路線。紅色雙條一般收費30銖，但路途稍為遠一點就會收貴一些，沒有準則，要先向司機說明目的地。
初來甫到，頭幾天都是用Call車App，呢日港婦話點都要試下坐雙條。之前截過一次，都係想由Maya商場前往Central Festival（車程10分鐘），但向司機問價，兩人收費200銖，很明顯搵老襯，梗係冇落疊。今次學精了，直接問司機係咪30銖一位，免佢開價，佢揚一揚手示意我們上車。Super-highway沿途清風送爽，眨眼就到埗，落車隔窗繳付60大匹，講聲Thank you，禮成！呢程如果call車大約要80至90銖。
至於另一種只聞樓梯響嘅交通公具，就係輕鐵。據聞泰國政府近30年前已經提出興建，但波折重重，經費不足，擱置、改規劃，最近重新上馬，但要到2025先開始起，2028年底先落成，仲有排等。
清邁生活圈一般都係半小時車程，最遠都很少超過45分鐘，但未計塞車（原來塞車唔係曼谷專利，返放工時間清邁主要幹道都會很擠塞）。要去離市中心遠一點的地方，例如不少住宅區，唔揸車就要靠Call車App。呢度興用三個App，冇Uber份。
Grab服務最好，又最多車，不用等太久，而且車輛都很新淨企理。但價錢最貴。Grab還有拍照功能，當司機不清楚你的確實位置，你可以影張相傳畀佢。
Bolt最便宜，可以比Grab平一半，但車少，等得耐，有時要20至25分鐘，甚至沒人接單。而且車都比較陳舊，有欠整潔，試過坐過一架滿地垃圾的。
inDrive質素在兩者之間，價錢比Grab平一點，而且可以講價。我現在都會先call inDrive，如無人接單才叫Grab。
這篇文章題目係「雙條車 vs Call車App」，因為除了疫情打擊，近年Call車App必定搶了雙條不少生意，雙條要繼續生存就要維持競爭力。上面提到雙條會開天索價搵老襯，現在舉多個例子：我們有天要由大學夜市回家，車程約15分鐘。夜市門外有雙條在等客，我問是否30銖一位，司機說要50銖，兩人就是100銖，而且這個價錢不能即時開車，要等多幾個客。於是我轉而call inDrive，收費93銖，車輛3分鐘來到。畀你會點揀？
不過坐雙條有生風吹下都幾爽，如果五、六人想上山一日遊，包架雙條係唔錯選擇，不用分開兩架私家車，又可相對而坐傾下偈，望下車尾明媚風光。
2022.11.22
清邁交通、清邁旅遊、清邁景點、清邁退休生活、清邁雙條車、清邁call車app
コメント